حقيقة الدنيا ... بطيخة

يا حبيبتي ليه بتزعلي ؟؟!!

دانا كل أملي للحقيقة توصلي

انا عارف إنك ماحصلتيش

قبل كده

ولا مرة تانية هتحصلي

لكن الحقيقة كده وكده

بطيخة خضرا بنشتريها

وغيرنا حمرا بيلاقيها

ماتفكريش ولا تسألي

بالعكس حاولي تعَقَّلي

كل اللي مش فاهم كده

إن الحقيقة مش كده

لكن كده

غيرنا يشوفها

واحنا غيره بنشوفها

وياريته يفهم كده وكده

وانتي

من تاني لسه بتسألي

ولسه عايزة تكملي

بُعدك ومني بتزعلي

وماتعرفيش

ان الحقيقة كده وكده

حزن وسعادة

طيبة وجمود

عدم ووجود

نقص وزيادة

فعينيكي سادة وفعيوني عادة

مرة لذاذة ومرة مزازة

دنيتنا كورة مدورة

بطيخة خضرا محجرة

وبرده حمرا مسكرة

حاولي بجد تصدقي

وحياه جديدة تبدأي

تتأملي

هتكملي

وهتعرفي

وهتوصلي وتوصَّلي

إن الحقيقة كده وكده

نفسي

نفسي أخرج من إزازة حبي ليكي

نفسي قلبي يقوى لما يشوف عينيكي

نفسي أبعد

نفسي أنسى

نفسي ابطل أشتريكي

نفسي أعرف ابتسم

والفرحة جوة عيني مرة تترسم

نفسي الدنيا ماتقاسيش معايا

نفسي الدمع وحده مايواسيش هوايا

نفسي أكسرها الإزازة

نفسي ادوق حاجة غير طعم المزازة

نفسي احس بلهفة مرة وخوف عليا

نفسي بس عارف مش بإيدك

ولا مرة كان عمره بإيديا

حتى الإزازة

كان نفسي أكسرها لكن

مش بإيدي

عمري كله كنت عايشه فيها ساكن

ساكن في نار مابتنتهيش

وحلم نفسي يبتدي مابيبتديش

نفسي ونفسي ونفسي ونفسي

نفسي اكسرها الإزازة لكن غصب عني

الحنين لعنيكي جواها سجنّي

لهفتي والخوف عليكي فيها قتلني

وانتهى وياكي عمري

واتكتب في الحب قدري

وانتهت كل الحكاية

واتقسم تبقى النهاية

ألقى في الإزازة قبري